Al Tamur Traders

Friday, June 8, 2012

'HAMD' AUR 'NEMAT' ME LAFZ " ISHQ"---EK TAHQEEQI JAAYEZA







Bismillahirrahmanirraheem




Hamd baari taala aur nemat nabi sallalaho alaihi wasallam (pbuh) ye aisi do zaat hain jinka charcha har mahfil ,har maidaan me aur har zabaan wa adab me milta hai, mukhtalif zabaano me alag alag andaz se hamd aur nemat gungunaaye jaate hain, chaahe wah nazam ki shakl me ho ya phir nashr ki shakal me ho, magar baaz awqaat kuch aisi laghzishen ho jaati hain ke kuch logon ko ek khala aur kami si mahsoos hone lagti hai,

lafz e " ISHQ" ko hi le lijiye, ye lafz sunte hi tabiyat me hejaan sa hone lagta hai,

zahen e insani is maane par ghoomne lagta hai, lekin phir bhi iska istemal allah aur uske rasool nabi sallalaho alaihi wasallam (pbuh) ke liye bade hi fakhr ke saath ho raha hai, main apne is mukhtasar se note me lafz " ISHQ" ki haqeeqat ko zaahir karne ki koshish karunga-- (inshaallah)


LAFZ " ISHQ " KA MAFHOOM:



" ishq " arabic zabaan ka lafz hai, isliye iska sahih mafhoom jaanne ke liye ham arabic lughat (dictionary) ki taraf chalte hain:


qamoos me likha hai:

" jinno ke bahut saare aqsaam hain, ishq bhi jinno ki ek qism hai, is marz ko insaan apne nafs par baaz sooraton ya khaslaton ke accha samjh lene se khud waarid kar leta hai "

(qamoos)


kareem ul lughat me " ISHQ " ke maane hain:-" ek qism ka jinno- mard, aurat se aur aurat ka mard re intehaayi zyada muhabbat karne ko ishq kahte hain "


imam tahawi apni kitab me farmate hain:-" yani ishq kahte hai shahwat ke saath muhabbat karne ko"


(sharah aqeedatul tahawiyah page 165)



LAFZ " ISHQ" QURAN WA HADITH ME:


Ye baat saabit hai ke arabic adab me quran aur hadith e rasool nabi sallalaho alaihi wasallam (pbuh) se ziyaadah motbar aur jaame shakhs koi nahi mil sakta, aur khaas kar ham musalmano ka to ye mar'ja awwal hai aur mar'ja aakhir bhi hai, Khawaah wah deeni aitbaar se ho ya phir insaani adab ke aitbaar se ho


qur'an majeed aur hadith e paak ke mahireen se ye amr makhfi hai ke qur'an shareef aur hadith paak me lafz " ISHQ" ka istemal nahi huwa hai,


is silsile me qazi sulayman mansoorpuri (rh) likhte hain :-" ishq ke maana qasme jinno ke hain, to zaroori tha ke khuda aur rasool ke paak kalaam me is lafz ka istemaal na kiya jaaye (aur huwa bhi nahi hai) aur ise fazail e mahmoodah ya muhaasin jumla se shumaar na kiya jaata, beshaq qur'an hakeem me aur hadith paak me lafz " muhabbat" ka istemal huwa hai aur isse saabit ho gaya ke muhabbat ki siffat kamaal insaani hai"


(rahmatul lil aalameen jild 2 page 326)


muhabbat aur ishq me ye farq hai ke:-" muhabbat rooh ke meelaan sahih ka naam hai, aur ishq me us shart ka paaya jaana zaroori nahi hai, yahi wajah hai ke quraan shareef me lafz ishq kahin nahi aaya hai, jagah jagah lafz muhabbat ka Hi istemal hai, aur hadith paak me bhi ishq jaise alfaaz nahi waarid huwe hain "


URDU TABQA ME LAFZ " ISHQ" KA ISTEMAAL:


Ye ek haqiqat hai ke lafz ishq ko farogh dene me urdu ghazal likhne waalon ka bada dakhal hai, unhi ki wajah se ye lafz urdu zabaan me aam huwa. Urdu shaayron ne usko chaar chand laga diya,

magar afsos is baat par hai ke aaj ye lafz muhabbat ke izhaar ke liye sab se faseeh samjha jaata hai,

khaas kar nabi e akram sallalaho alaihi wasallam (pbuh) se muhabbat ke izhar ke liye lafz " ISHQ " ko ek tarah se makhsoos kar liya gaya hai,


maulana sayyed suleman nadwi (rh) ' rahmatul lil aalameen jild 3 ' ke muqaddama me likhte hain:

"nazireen dekhenge ke ek aashiq e rasool ke qalam se ishq wa muhabbat ke......... Gauhar numaayan hain "

(rahmatul lil aalameen jild 3 page 7)

qaabil ghaur nuktah ye hai ke jis kitab me musannaf ne lafz ishq ko allah aur rasool ke liye baatil qaraar diya Hai, usi kitab ke muqaddama me nadwi sahab ne nabi e akram sallalaho alaihi wasallam (pbuh) ke liye is makrooh aur napak lafz ko istemal karke saaf nikal gaye...

Mirza ghalib aur urdu zabaan me hujjat hain, unhone bhi is lafz ko istemal kiya hai,

magar ghaalib ke liye ye kaha ja sakta hai ke ye arabic aalim nahi they balke ye urdu zabaan ke ustaad they,

chunke mirza ghalib shia maslak ko maanne waale they, isliye unke yahan agar uska paas wa lihaaz nahi hai toh kya huwa ??

Lekin shayraah e islam allama iqbaal bhi isse nahi bach sake,

awwalan to unke yahan nemat goyi me badi khaamiyan hain, unke baaz naatiya ash'haar padhne se toh ye ghuman hone lagta hai ke ye bilkul bhi islami shayar ka laqab paane waale nahi ho sakte,

maslan unka ye shayr ki gumraahi par daal hai,

" wah zameen hai toh khwab gaahe mustafa

deir hai kaba ko teri hajj waadi seena"


jab ye nemat goyi me is qadar gumraah ho sakte Hain toh unse bhi kya tawaqqo ki ja sakti hai ke unhone is silsile me ustaazah urdu ki taqleed na ki hogi,

iqbal doctor they, allama they, aur shayar e islam they, sab kuch they , magar ghaalib ki tarah ye bhi arabi'daan na they, isliye ye daleel pesh karna ke shahab ghaalib jaise unche shayar ne ise istemal kiya hai, aur allama iqbaal jaise jaleelul qadr islami shayra ka istemal saamne hai, lihaaza uske istemal me koi qabahat nahi, ye durust na hoga...


Agarchah urdu zabaan wa adab me ye lafz raij hai, magar arabic zabaan wa adab ne is lafz se allah aur uske rasool nabi sallalaho alaihi wasallam (pbuh) ko bari rakha hai,

lihaaza ham musalmano ka ye deeni fareeza hota hai ke ham bhi lafz " ISHQ" ko sirf uski asli maano me istemal karen,

allah aur uske rasool nabi sallalaho alaihi wasallam (pbuh) ke liye bilkul bhi istemal na karen, aur urdu adab ko be'adab banaane ki hargiz koshish na karen............