Al Tamur Traders

Wednesday, April 1, 2015

SHADI ME LOGON KE KHUD BANAAYE HUE RASM O RIWAAJ !




Bismillahirrahmanirraheeem

SHADI ME LOGON KE KHUD BANAAYE HUE RASM O RIWAAJ !


Log In Rasm O Riwaaj Me Is Qadr Aage Badh Chuke Hain Ke Shadi Karne Wala Unke Bojh Ko Bar'daasht Karne Se Aajiz Aa Jaata Hai, Aur Shadi Ke Naam Se Nafrat Karne Lagta Hai,

Mahenge Kapde Banaane, Qeemti Zewaraat (Expensive Jewelery) Khareedne, Bed Room Ko Sajaane Wa Sawaarne, Dawaten Karne, Khaana Wa Ghosht Barbaad Karne Aur Dono Khaandaano Me Baraabar Aane Jaane Ke Silsilon Me Fuzool Kharchi Se Kaam Liya Jaata Hai,

Bechaare Shauhar Ki Kamar Ise Uthaate Uthaate Duhri Ho Jaati Hai, Ye Sab Kuch Shauhar Ke Liye Kisi Taur Par Faayede'mand Nahin Balke Iska Saara Faayeda Dukaan'daron Ki Jebon (Pockets) Me Jaata Hai,

Ye Tarah Uski Aamdani (Savings) Bina Maqsad Barbaad Ho Jaati Hai,

Balke Shadi Ki, Jo Logon Ki Zaroorat Hai Usme Rukawatein Daal Dete Hain,

Afsos Ke Kuch Bad'tahzeeb Aur Kam Aqal Logon Ne Musalmano Ko Bahut Si Buri Aadaton Me Daal Diya Hai Aur Kai Haram Kamon Ko Shadi Ke Zaroori Kaam Bana Diya Hai,

Hotels Aur Restourants Me Shadi Ki Mahfilein Sajaayi Jaati Hain, Shabbe Dari (Rat'jaga Jisme Ladke Ladkiyan Poori Raat Dance Karte Hain) Ka Program Kiya Jaata Hai, Music Par Dance Ka Program Hota Hai Jisme Be'pardagi Aam Hoti Hai Aur Bade Bade Gaane Walon Ko Bulaaya Jaata Hai,

Fir Tamam Logon Ke Saamne Dulha Dulhan Ko Pesh Kiya Jaata Hai Aur Aksar Waqt Dulham Behaya Auraton Ki Tarah Ban'sajh Kar Be'hijaab Hokar Baith Jaati Hai Aur Fir Najayez Tasweer Kashi Ka Amal Aur Photo Session Ka Marhala Shuru Ho Jaata Hai,

Aisi Shadi Haram Rasm O Riwaj Ki Wajah Se AllaH Aur Uske Rasool Muhammad Sallalaho Alaihi Wasallam Ki Mukhaalifat Aur Fasaad Wa Bigaad Ke Bhanwar Me Fans Jaati Hai,

Fir Aksar Shadi Ke Baad Shauhar Honey Moon Manaane Ke Liye Apni Biwi Ko Lekar Akhlaaqi Qaid Se Azaad Mulkon Aur Jagahon Ki Taraf Chal Padta Hai, Taake Wahan Jaakar Sharm O Haya Ki Chadar Utaar Kar Fenke, Fir Waapsi Par Aise Gande Aur Bure Afkaar Apne Dimagh Me Bhar Laate Hain Jo Mulk Wa Deen Dono Ke Liye Na'qabil Qubool Hoti Hai,

Ye Aise Ruswa Karne Waale Kaam Hote Hain Ke Unko Dekhkar Peshani Sharm Se Jhuk Jaaaye Aur Sharf Izzat Paani Paani Ho Jaaye, Lekin Murde Ko Nastar Chubhaane Ka Dard Kahan Hota Hai ?? !

Aiy Allah Ke Bandon ! Shadi Ke Raaste Me Aisi Rukaawatein Khadi Kar Dene Ke Bahut Zyadah Nuksanaat Hain,

1- Nikah Ki Taqat Na Rakhne Ki Wajah Se Nikah Me Kami Paida Ho Jaati Hai Aur Mard Aur Aurat Dono Gande Kaamon Me Padh Jaate Hain, Aur Samaji (Social) Bigaad Paida Ho Jaata Hai,

Kyonki Agar Jayez Kaam Me Rukaawat Ho Toh Na'jayez Kaam Ka Darwaaza Khul Jaata Hai, Har Cheez Jab Hadh Se Ghuzar Jaaye Toh Wah Apni Asal Haalat Ko Chhod Tabdeel Ho Jaati Hai,

2- Fir Hadh Se Zyada Fuzool Kharchi Ki Jaati Hai, Jo Qur'an Wa Sunnat Ki Roshni Me Haram Hai,

3- Wali (Guardian Ya Parents) Jab Apne Maat'hat Ke Liye, Munaasib Aur Nek Rishtey Mahaz Is Wajah Se Inkaar Kar De Ke Usse Is Qadr Haq Mahr Milne Ki Tawakkoh Nahin,

Ya Ye Ke Woh Shadi Ke Kharche Bardaast Karne Ke Qaabil Nahin Hai Toh Wah Uske Saath Dhoka Karte Hue Aise Shakhs Ka Intekhaab Karta Hai Jo Ye Sab Kharche Uthaane Ki Himmat Rakhta Hai,

Chaahe Uska Deen Aur Akhlaaq Kaisa Hi Kyun Na Hon, Ye Shakhs Apni Bahen Ya Beti Ki Khushi Ko Koi Ahmiyat Nhin Deta,

Agar Koi Shakhs Aise Kaamon Ka BaaR Baar Karne Ka Aadi (Habitual) Ho Toh Wah Shariat (Islam) Ki Nazar Me Nafarmaan, Deen Me Sifar (Zero) Aur Darja Adaalat Wa Sadaaqat Se Gir Jaata Hai,

Isliye Allah Ke Bandon ! Allah Tala Se Darte Raho Aur Is Maamle Ki Sangeeni Samjhte Hue Nikah Ko Munaasib Ahmiyat Do,

Allah Tala Ka Irshad Hai

" Aur Apne Mese Be'nikah Mardon Wa Auraton Ka Nikah Kardo Aur Apne Ghulamo Aur Laundion Se Jo Nek Hain Unka Bhi, Agar Wah Mohtaj (Ghareeb) Honge Allah Unhe Apne Fazal Se Ghani (Ameer) Kar Dega Aur Allah Wus'at Wala Aur Sab Kuch Jaanne Wala Hai"

(Surah Noor Ayat No 32)

#IslamicLeaks
#UmairSalafiAlHindi
#RabbatUlBait