DAHEJ LENE ME LENE ME LAALACH AUR HAQ MEHAR DENE ME KANJOOSI : (PART-4)

Bismillahirrahmanirraheem

DAHEJ LENE ME LENE ME LAALACH AUR HAQ MEHAR DENE ME KANJOOSI : (PART-4)

Dahej Ka Tassawwur Islam Me Nahin Hai Log Jhooti Baton Ki Buniyaad Par Dahej Ko Saabit Karte Hain Aur Dahej Na Dene Waalon Ko Taana Dete Hain, Lekin Dusri Taraf Allah Taala Ne Quraan Me Kai Baar Haq Mahar Dene Ka Huqm Diya Hai, Lekin Insaan Hai Ke Allah Ki Baghaawat Aur Shaitaan Ki Himaayat Par Tula Hua Hai, Shadi Ke Mauqe Par Dahej Leta Hai,Gaane , Baaje,  Ka Ehtemam Karta Hai Aur Khilaaf E Sunnat Dawaatein Bhi Karta Hai  Aur  Na Jaane Kon Kon Se Ulte Kaam Karta Chala Jaata Hai, Lekin Jab Molwi Sahab Ko Nikaah Padhaane Ke Liye Laaya Jaata Hai Aur Wah Poochta Hai Ke

“ Janaab ! Haq Mehar Kitni Denge “

Toh Muh Tedha Karke Kahta Hai Ke :-“Jo Shariat Kahegi  !”

Sharm Nahin Aati Ke Mangni Se Lekar Baraat Ki Waapsi Tak Balke Rukhsati Se Lekar Kai Din Baad Tak Jo Kaam Kiya Wo Kaam Khilaaf E Shariat They Unme Shaitaan Ko Raazi Karta Chala Aaya Lekin Haq Mahar Jo Aurat Ka Haq Hota Hai Uske Beghair Nikah Nahin Hota Hai, Agar Biwi Se Kamala Muhabbat Karte Hue Lakh Rupiye Bhi De De Toh Jayez Hoga Is Jayez Kaam Me Wo Kam’chori Par Tula Hua Hota Hai,

Haq Mahar Me Agar Koi Shakhs Crore Rupiye Bhi De Dega Toh Ye Jayez Hoga Kyunki Apni Biwi Par Ye Ehsaan Hoga, Haq Mahar Aurat Ka Haq Hota Hai Isme Mard Ka Koi Ikhtiyaar Nahin Hota, Aurat Apna Haq Mahar Jahan Lagaaye Laga Sakti Hai,Mard Ko Is Par Koi Aitraaz Ka Haq Nahin Hota,

Agar Ye Apni Biwi Ki Milkiyat Me Crore Rupiye Kar Deta Hai  Toh Ye  Bilkul Durust Hoga Lekin Afsaos Hai Ke Uski Tamaam Rusumaat Me Se Koi Cheez Bhi Shariat Ke Mutaabik Nahin Thi Sirf Nikah Ka Khutba Aur Haq Mehar Ki Adaayegi Shariat Ke Mutaabik They Inme Use Shariat Yaad Aa Gayi, Fir Agar Kisi Ne Bata Diya Ke Sharai Haq Toh 25 Rupiye Hai Toh Ye Sunkar Wo Khus Ho Jaata Hai Aur Poori Zindagi Khidmat Ka Sila Aurat Ko 25 Rupiye Hi Deta Hai, Itni Badi Sakhaawat Itni Badi Qurbani ?? Subhaanallah

Kuch Log 100 Ya 500 Rupiye Haq Mahar Me Dekar Biwi Par Itna Bada Ehsaan Karne Me Kaamyaab Ho Jaate Hain, Inna Lillahi Wa Inna Ilaihi Rajioon,

Kuch Log Sham Ko Haq Mehar Dete Hain Fir Subah Sawere Uthte Hi Biwi Ko Kahte Hain Ke

“Raat Jo Maine Haq Mahar Me 500 Rupiye Diye They Wah Mujhe Qarz De Do Main Aapko Falan Din De Dunga”

Aurat Bechaari Seedhi Saadi Hoti Hai Wah Kuch Waalidain Ki Judaayi Ke Gham Me Hoti Hai Aur Kuch Use Khauff Hota Hai Ke Malum Nahin Naye Gharwaale Mere Saath Kaisa Sulook Karenge, In Baton Ke Pesh E Nazar Wo Majboor Hoti Hai Wah Apne Shauhar Ko Saari Raqam De Deti Hai, Use Kya Maalum Ke Ye Mujhse Dhoka Kar Raha Hai Aur Mujhse Jhoot Bolkar Paise Le Jar Aha Hai, Fir Ye Mujhe Waapas Nahin Karega ??

Isliye Ham Ladki Ke Waarison Se Ghuzaarish Karenge Ke Haq Maharwo Nikah Se Pahle Wasool Kar Len Fir Jab Ladki Apne Sasuraal Chali Jaaye, 15-20 Din Use Ghar Ke Mahaul Se Waaqfiyat Ho Jaayegi Aur Use Apni Zarooriyaat Ka Pata Bhi Chal Jaayega Tab Wah Raqam Munaasib Mauqe Parapni Beti Ke Hawaale Kar Den Is Tarah Wah Haq Mehar Beti Ke Kaam Aa Jaata Hai,

Kuch Log Dahej Nakad (Cash) Ya Advance Le Lete Hain Lekin Haq Mehar Udhaar Kar Lete Hain, Ye Bhi Zulm Hai, Haq Mehar Me Mard Chaahe 100 Rupiye De Ya Lakh Wah Laam Toh Apne Ghar Hi Aata Hai Toh Fir Log Aakhir Haq Mehar Dene Me Kyun Hichkichate Hain ???

SHADI KE MAUQA PAR BARAAT KA KHARCHA KAUN KAREGA???

Shadi Par Aane Waale Tamaam Kharche Ka Jimmedaar Shauhar Hota Hai Lekin Maujoodah Daur Me Amuman Ye Hota Hai Ke Saari Baraat Ki Pur’taqalluf Daawat Bhi Beti Waalon Ke Zimme Hoti Hai, Ab Bataayen Ke Beti Waala Beti Bhi De Aur Uske Saath Saath Dahej Ke Samaan Ke  Truck Bhi De Aur Baraat Ki Pur’taqalluf Daawat Bhi De Toh Beti Waale Itna Bada Bojh Halal Kamaayi Se Kahan Uthaa Sakte Hain  ??

Zaahir Hai Itna Bada Bojh Uthaane Ke Liye Waalidain Najayez Tareeqon Se Maal Ikattha Karenge Jo Society Ke Liye Har Soorat Me Nuksaan Deh Hai, Baraat Ko Khilaane Ke Liye Zaroori Nahin Ke Pur’taqalluf Daawat Di Jaaye Balke Khajoor Aur Sharbat Se Khaatir Ki Ja Sakti Hai, Pur’taqalluf Daawat Khilaakar Logon Ke Saamne Toh Insaan Surkhuru Ho Jaata Hai Lekin Uska Deeni Aur Muaasharti Nuksaan Hadh Se Zyadah Hai,

Shadi Ka Maqsad Khana Aabaadi Hoti Hai Lekin Pur’taqalluf Dawaton Aur Aur Dahej Se Khana Aabaadi Nahin Balke Khana Barbaadi Ho Jaati Hai……

To Be Continued….

#UmairSalafiAlHindi

#IslamicLeaks   

DAHEJ EK RISHWAT HAI: (PART 3)

Bismillahirrahmanirraheem

DAHEJ EK RISHWAT HAI: (PART 3)

Ek Shakhs Kisi Ki Ladki Is Shart Par Leta Hai Ke Ladki Ka Baap Use Dahej Ki Soorat Me Maal De  Toh Ye Ek Kameena Harkat Hai Aur Wah Haraam Maal Lene Ka Murtakib Hoga Kyunki Ye Rishwat Ke Zamre Me Aata Hai,

Agar Koi Sasur Apne Daamaad Se Apni Beti Byaahne Ki Wajah Se  Kuch Leta Hai Toh Ise Fiqh Hanafi Ne Bhi Haraam Kaha Hai,

SOCHNE KI BATEIN:

Sochne Ki Baat Hai K Eek Baap Apni Beti Paida Hone Se Lekar Kai Saalon Tak Uski Parwarish Par (Khaane , Peene,Libaas, Ilaaj Etc) Bila’hisaab Maal Kharch Karta Hai Lekin Wah Damaad Se Kuch Lene Ka Haq Nahin Rakhta Toh Damaad Ko Kya Haq Pahunchta Hai Ke Wah Kisi Se Beti Se Uski Beti Bhi Le Le Aur Uska Ghar Bhi Saaf Kar Le ???

Jo Shakhs Apni Beti Ko Apni Naak Rakhne Ke Liye Dahej Deta Hai Toh Damaad Ko Chahiye Ke Wah Dahej Lene Se Inkaar Kar De, Agar Wah Le Lega Toh Wah Haraam Kaam Ka Murtakib Hoga Kyunki Maalum Nahin Ke Baap Ne Kis Tarah Museebat Kaat Kar Dahej Banaaya Tha Yaw Ah Naak Rakhne Ke Khaatir De Raha Hai ?? Agar Ye Log Beti Ko Dahej Dene Me Mukhlis Hain Toh Warsa (Wiraasat Me Hissa) Kyun Nahin Dete ???

Agar Koi Shakhs Bhikaarion Ka Tareeqa Ikhtiyaar Karte Hue Susuraal Se Maal Ka Mutaalba Karta Hai Toh Wah Ikhlaaqan, Aqalan, Shar’an Har Tarah Se Mujrim Aur Gunaah E Kabeera Ka Murtakib Hai, Is Bheek Maangne Se Toh Ye Accha Tha Ke Wah Kisi Road Par Ya Masjid Ke Darwaaze Par Kapda Bichha Kar Baith Jaata Aur Har Aane Waale Se Eke K Rupiya Maang Ka Apna Matlooba Maal Bana Leta, Kam Se Kam Wah Log Use Rupiyah Apni Khushi Se De Jaate  Jabke Apne Susraal Se Zabardasti Maangta Hai Ya Dahej Ko Apna Haq Jaankar Usse Maal Milne Ki Khwaahish Rakhta Hai Ye Dono Cheezein Ghalat Hain,

Dekhiye Auratein Mard Ki Khaadimah Hoti Hain Wah Apni Khidmat Ke Badle Mard Ke Ghar Se Khaati, Peeti, Pahenti Hai Aur Shauhar Ke Bacchon Ki Bhi Ghulaami Aur Khidmat Karti Hain Agar Use Talaaq Ho Jaati Hai Toh Sab Kuch Chhod Kar Apne Maa Baap Ke Paas Chali Jaati Hai Yani Shauhar Ke Ghar Aur Maal Aur Aulaad Mese Uska  Kuch Bhi Nahin Hota Toh Koi Aqalmand Ye Kah Sakta Hai Ke Aurat Apne Shauhar Ki Ghulaami Bhi Kare Aur Apne Saath Maal Bhi Lekar Aaye Taaki Mard Ko Mehnat Na Karni Pade Aur Muft Me Use Sab Kuch Mil Jaaye ??

Society Me Aise Bhi Kai Log Hain Jo Kisi Faahisha Aurat Ke Dance Par Laakhon Ya Hazaaron Rupiye Lutaa Dete Hain, Lekin Apni Biwi Ko Jayez Aur Munaasib Haq Mehar Dene Ko Taiyyar Nahin Hote, Jisko Poori Zindagi Unki Khidmat Karni Hoti Hai,

DAHEJ KE LAALCHI AURATON PAR KYA KYA ZULM KARTE HAIN ::

Damaad Sasur Se Uski Lakht E Zigar Ke Saath Saath Samaan Ki List Bhi Pesh Kar Deta Hai, Ladki Ka Baap Jaise Taise Kar Ke Uski List Poori Kar Den Tab Bhi Ye Silsila Khatam Nahin Ho Jaata, Balke Jab Wah Biwi Ko Ghar Me Laata Hai Toh Uske Baad Bhi Apne Sasuraal Ko Farmaish Bhejta Hai Ke Falan Cheezein De Do Aur Agar Ye Cheezein Na Mili Toh Main Tumhari Beti Ko Talaaq De Dunga, Ab Maa Baap Ke Liye Azeeb Pareshaani Hoti Hai Wah Samjh Nahin Paate Ki Wah Kya Karen…

Agar Matlooba Cheezein Mil Gayi Toh Theek Warna Ladki Ko Talaaq Mil Jaati Hai Ya Fir Din Me Kai Baar Use Ulti Chhuri Se Zibaah Kiya Jaata Hai Kabhi Kabhi Ladki Tang Aakar Khud’kushi (Suicide) Bhi Kar Leti Hai Bataiyyre Dahej Ne Kya Kya Gul Khilaayen Hain ??

 Dahej Na Milne Ki Wajah Se Insaan Apni Biwi Par Zyadati Karta Hai Use Taane Deta Hai Use Pareshaan Karta Hai Yun Miyan Biwi Ke Taalluqaat Khush’gawaar Nahin Ho Paate Balke Unke Darmiyaan Ikhtelafaat Ho Jaate Hain Aur Ye Ikhtelafaat Miyan Biwi Ke Darmiyaan Nahin Balke Do Khaandaano Ke Darmiyaan Hote Hain Aur Do Khaandaano Ka Ikhtelaafaat Maamuli Nahin Hota Balke Ye Junglr Ki Aag Hoti Hai Jo Dono Khaandano Ke Kai Afraad Ko Bhasm Kar Deti Hai,

Aur Hadees E Rasool Muhammad Sallalaho Alaihi Wasallam Me Aaya Hai Ke,

“Shaitaan Ko Jitni Khushi Miyan Biwi Ke Darmiyaan Taalluqaat Khatam Hone Par Hoti Hai Utni Kisi Cheez Par Nahin Hoti Hai”

Dahej Ka Bhooka Jahan Bheek Maang Raha Hota Hai Wahan Wah Apni Biwi Par Zyaadati Karta Hai Use Pareshaan Karta Hai, Haraam Maal Ka Mutaalba Kar Raha Hota Hai, Do Khaandaan Ke Darmiyaan Ikhtelafaat Ko Hawa De Raha Hota Hai, Shaitaan Ko Khush Kar Raha Hota Hai, Allah Ko Naraaz Kar Raha Hota Hai Wagerah Wagerah,

Allah Taala Ne Mard Ko Aurat Par Isliye Bhi Fazeelat Di Hai Ke Wah Apne Biwi Bacchhon Par Kharch Karta Hai Agar Mard Ke Akhraajaat Aurat Kare  Toh Fir Ye Nikamma Mard Kis Kaam Ka ???

To be continued

#IslamicLeaks

#UmairSalafiAlHindi

KYA NABI E KAREEM MUHAMMAD SALLALAHO ALAIHI WASALLAM NE HAZRAT FATIMAH (RA) KO DAHEJ DIYA THA ??

Bismillahirrahmanirraheem

KYA NABI E KAREEM MUHAMMAD SALLALAHO ALAIHI WASALLAM NE  HAZRAT FATIMAH (RA) KO DAHEJ DIYA THA ??

Dahej Ke Haami Kahte Hain Ke

“Nabi E Kareem Muhammad Sallalaho Alaihi Wasallam Ne Apni Beti Hz Fatimah Ko Takiyah, Mashkeeza Wagerah Cheezein Di Thin, Nabi E Kareem Muhammad Sallalaho Alaihi Wasallam Ne Jo Cheezein Dahej Me Di Thi Wah Us Waqt Ke Lihaaz Se  Keemati Thi, Aaj Kyunke Khush’hali Ka Daur Hai Isliye Aaj Beti Ko Dahej Me Keenmati Samaan Dene Me Koi Harz Nahin “

Agar Dahej Ka Tasawwur Islam Me Hota Toh Toh Nabi E Akram Muhammad Sallalaho Alaihi Wasallam Sirf Hazrat E Fatimah (Ra) Ko Nahin Apni Tamaam Betion Ko Dahej Dete, Dusra Ye Ke Aap Dahej Me Sirf Ye  Cheezein Na Dete Balke Aap Arab Ke Baadshah They Aap Ek  Waqt Me Sainkdon Oont Sadaqah Kar Diya Karte They, Agar Aap Sallalaho Alaihi Wasallam Chaahte Toh Uhud Pahaad Sone Ka Ban Jaata Agar Aap Sallalaho Alaihi Wasallam Dua Karte Toh Betion Ke Dahej Ke Mauqe Par Al;Lah Taala Apne Nabi Ko Bahut Kuch Ataa Farma Deta, Jab Aap Sallalaho Alaihi Wasallam Ne Iske Bawajood Wah Chand Mamooli Cheezein Di Thi Aur Dahej Nahin Diya Toh Malum Hua Ke Dahej Ki Koi Haqeeqat Nahin Hai,

Nabi E Kareem Muhammad Sallalaho Alaihi Wasallam Ki Jauziyah Mohtarma Hazrat Khadija (Ra)  Apni Badi Beti Hazrat Zainab (Ra) Ko  Haar Diya Tha, Nabi E Kareem Muhammad Sallalaho Alaihi Wasallam Ne Hazrat Fatimah Ko Mashkeza, Takiya Wagerah Cheezein Di Thi Wah Wah Dahej Ka Sabot Nahin Ban Sakta,

Jahan Tak Hazrat Zainab (Ra) Ke Haar Ka Taalluq Hai Wah Nabi E Kareem Muhammad Sallalaho Alaihi Wasallam Ne Nahin Diya Tha Balke Hazrat E Khadija Ne Diya Tha, Dusra Ye Ke Koi Ba’zid Hokar Kahta Hai Ke Wah Haar Nabi E Akram Muhammad Sallallaho Alaihi Wasallam Ne Hi Apni Beti Ko Diya That Oh Ye Waqiyah Aap Sallalaho Alaihi Wasallam Ke Nabi Ban Kar Duniya Me Aane Se Pahle Ka Waaqiyah Hai, Aur Besat E Nubuwwat Se Pahle Kiya Gaya Kaam Daleel Nahin Ban Sakta,

Teesra Ye Ke Wah Haar Bataur Dahej Nahin Balke Apni Beti Ko Rukhsat Karte Waqt Wah Haar Tohfa Diya  Ya Is  Tarah Samjho Ke Wah Haar Hazrat E Zainab Pahna Karti Thin Kyunki Wah Hazrat E Khadija Ki Badi Beti Thin Jab Unki Rukhsati Hui Toh Wah Haar Hazrat E Zainab Se Nahin Utarwaaya Gaya,

Us Haar Se Zyadah Se Zyadah Ye Saabit Hota Hai Ke Agar Kisi Ladki Ko Maa Rukhsati Ke Waqt Koi Cheez Apni Khushi Se  De De Toh Wah  Jaayez Hai Aaj Bhi Aisa Kiya Jaa Sakta Hai Lekin Dahej, Hiba Ya Tohfa Nahin Balke Ye Koi Aur Cheez Hoti Hai,

Dahej Na Dene Ka Ye Matlab Nahin Hai Ke Aadmi Apni Beti Se Wah Cheezein Bhi Le Le Jo Wah Ghar Me Istemaal Kiya Karti Thi, Maslan Kapde, Joote, Zewar Wagerah Hazrat Zainab (Ra) Agar Wah Haar Pahna Karti Thin Toh Unse Utaar Lena  Na’munaasib Tha Isliye Wah Saath Le Gayin Thin,

Baaqi Raha Hazrat E Fatimah Ka Dahej, Pahle Wah Toh Dahej Na Tha Kyunki Dahej Do, Teen Cheezon Ka Naam Nahin Hai,

Chalo Agar Maan Liya Ke Wah Dahej Tha Agar Aap Muhammad Sallalaho Alaihi Wasallam Ne Ye Cheezein Bataur Dahej Di Thi Toh Musalmaano Ko  Nabi E Kareem Muhammad Sallalaho Alaihi Wasallam Ki Sunnat Par Amal Karte Hue Sirf Wahi Cheezein Deni Chahiye Jo Nabi E Kareem Muhammad Sallalaho Alaihi Wasallam Le Apni Lakht E Jigar Ko Di Thi, Agar Dahej Dena Hota Toh Aap Sallalaho Alaihi Wasallam Aur Bhi Bahit Kuch Dete Agar Aap Sallalaho Alaihi Wasallam Ne Sirf Yahi Cheezein Di Hain Toh Maalum Hota Hai Ke Dahej Me Sirf Yahi Cheezin Di Jaaye,

Haqeeqat Baat Ye Hai Wah Dahej Nahin Tha Balke Wah Samaan Hazrat Ali (Ra)  Ki Jarrah Bech Kar Banaaya Gaya Tha Jo Ke Hazrat E Ali (Ra) Ne Hazrat E Fatimah (Ra) Ko Haq Meher Me Di Thi,

Aaj Bhi Agar Koi Shakhs Apni Beti Ke Haq Mehar Ki Raqam Pahle Se Le Aur Use Beti Ki Zarooriyaat Ka Bando’bast Kare Aur Rukhsati Ke Waqt Wah Cheezein Apni Beti Ke Saath Rawaana Kar De Toh Isme Koi Harj Nahin Balke Ye Sunnat E Nabawi Par Amal Hoga,

Agar Koi Shalkhs Ye Maanne Ke Liye Taiyyar Hi Nahi  Ke Wah Samaan Hz Fatimah (Ra) Ke Mehar Me Di Jaane Waali Jarrah Bech Kar Banaaya Gaya Tha

 Toh Ham Use Kahenge Ke

“ Agar Wah Samaan Khud Nabi E Kareem Muhammad Sallalaho Alaihi Wasallam Ne Napni Taraf Se Diya Tha, Tab Bhi Wah Dahej Nahin Tha  Balke Wah Toh Nabi E Akram Muhammad Sallalaho Alaihi Wasallam Ki Taraf Se Hazrat Ali (Ra) Ko Ta’aawun Tha Kyunki Hazrat Ali (Ra) Ko Paas Naa Toh Koi Ghar Tha Aur Na Hi Zindagi Basar Karne Ka Koi Dusra Samaan, Hazrat Ali (Ra)  Kyunki Nabi E Kareem Muhammad Sallalaho Alaihi Wasdallam Ki Parwarish Me They Aur Hazrat Ali (Ra) Ke Waalid Faut Ho Chuke They Toh Hazrat Ali (Ra) Ki Nigraani Aur Parwarish Nabi E Kareem Muhammad Sallalaho Alaihi Wasallam Khud Hi Kiya Karte They, Isliye Aap Ne Apni Beti Ho Chand Zaroori Cheezein Dekar Rawaana Farmaaya Tha,

Nabi E Kareem Muhammad Sallalaho Alaihi Wasallam Ne Hazrat Ali (Ra) Ko Ye Cheezein Bataur E Dahej Nahin Balke Ba’haisiyat Sar’parast Ta’aawun Ke Taur Par Ataa Ki Thi ,,

Isliye Agar Aaj Bhi Koi Shakhs Kisi Ki Parwarish Karta Hai Fir Apni Betti Ka Rishta Use Kar Deta Hai Toh Wah Sarparast Ki Haisiyat Se Jo Kuch Apni Ladki Ko Rukhsati Ke Waqt De Dega Toh Wah Sahih Aur Sunnat Ke Mutaabiq Hoga,

Khulaasa  Kalaam Ye Hai Ke Nabi E Kareem Muhammad Sallalaho Alaihi Wasallam Ne Hazrat E Fatimah (Ra) Ko Job Hi Diya Thaw Ah Dahej Nahin Thaaur Na Ummat Ke Liye Dahej Ka Sabot Ban Sakta Hai, Isliye Is Gandi Rasm Ko Sunnat E Nabawi Ke Saath Zodne Ke Jurm Ka Artikaab Na Kiya Jaaye

To Be Continued…..

#UmairSalafiAlHindi

#IslamicLeaks

DAHEJ KI TABAAH’KAARIYAN (HARMNESS OF DOWRY)- (PART-1)

Bismillahirrahmanirraheem

DAHEJ KI TABAAH’KAARIYAN (HARMNESS OF DOWRY)- (PART-1)

Deen E Islam Ek Muqammal Deen Hai, Jo Cheez Islam Me Maujood Hai Who Fayede Waali Hai Aur Jo Nahin Hai Wo Nuksaan’deh Hai Aur Society Ke Liye Tabaah’kun Hai,

Kitni Cheezein Aaj Society Me Chal Rahin Hain Jinka Islaam Se Koi Taalluq Nahin Hai Aur Unka Nuksaan Bhi Duniya Walon Par Saaf Hai Lekin Fir Bhi Log Bataur Fakhr Pasandi Ya Naak Rakhne Ke Liye Ya Kisi Aur Maqsad Ki Tahat Ise Is Dahej Ki Laanat Ko Apna Rahen Hain Fir Is Par Bas Nahin Balke Jo Shakhs Is Ghair Sharai (Unislamic) Kaamon Ko Na Kare Toh Usko Taane Diye Jaate Hain Aur Use Zaleel Kiya Jaata Hai Unmese Ek Dahej Ki Rasm Bhi Hai Dahej Ke Mane Ye Hain Ke

Ek Shakhs Apni Beti Ko Ghar Me Istemaal Karne Ki Har Cheez Muhayya Karne Ki Koshish Kare Jiska Zimme Aurat Par Nahin Balke Mard Ka Hota Hai, Chaahe Use Qarz Uthaana Pade Ya Dacaiti , Fraud Ya Haq’talfi Karni Pade Ya Use Bheek Maang Kar Zaleel Hona Pade, Ye Sab Kuch Karta Hai  Lekin Beti Ko Dahej Zaroor Deta Hai,

 Ye Rasm Barre Sagheeer Me Islamic Hukumat Khatam Hone Se Pahle Bahut Kam Thi Aur Jahan Se Wahan Aksar Ameer Hindu Gharaanon Me Hoti Thi  Jinki Aamdani Haraam Maal Se Hua Karti Thi Lekin In Ameer Gharaanon Ki Dekha Dekhi Me Ye Marz Ghareebon Me Bhi Badhta Chala Gaya Jo Ke Aaj Cancer Ki Soorat Akhtiyaar Kar Chukka Hai, Jo Taqreeban Mulk Ke Har Ghar Me Ye Marz Daakhil Ho Chukka Hai Ye Aur Baat Hai Ke Kuch Log Toh Dahez Apni Khushi Se Dete Hain Aur Nabi E Akram Muhammad Sallallaho Alaihi Wasallam Ki Sunnat Aur Islam Ka Tareeqa Samjh Kar Dete Hain, Lekin Kuch Log Ise Samjhte Toh Najaiaz Hain Lekin Fir Bhi Wah Dahej Dete Hain Taake Society Me Unhe Zillat Na Uthaani Pade, Haalanke Zillat Toh Wah Hoti Jo Aakhirat Me  Ho,

Ham In Posts Me Is Rasm Ke Ghalat Hone Ke Dalail Denge Aur Ye Batayenge Ke Dahej Ke Kya Nuksaanaat Hain Deendaar Aur Aqalmand Log In Cheezon Ko Padhenge Toh Khud Bhi Is Rasm Se Bachenge Aur Dusron Ko Bhi Mana Karenge Inshaallah

Kai Log Shadion Par Bahut Maal Lagaate Hain Aur Betion Ko Dahej  Zyada Se Zyada Dete Hain Unki Daleel Ye Hoti Hai Ke

“Shadi Ek Din Hoti Hai Baar Baar Nahin Hoti Isliye Ye Kharche Karna Sahih Hai”

Halaanke Ye Haqeeqat Hai Ki Shadiyan Ek Baar Nahin Baar Baar Aati Hain Kyonki Ek Shakhs Ki Kai Bête Aur Betiyan Hoti Hain Sab Ki Shadi Karni Hoti Hai T, Toh Maalum Hua Ke Shadi Ek Baar Nahin Balke Baar Baar Aati Hai Toh Insaan Me Zindagi Bhar Ki Jama Ki Hui Punji (Capital) Ek Din Me Laga Deta Hai, Dusri Shadi Ke Liye Fir Se Koshish Shuru Kar Deta Hai Ye Kisi Tarah Bhi Sahih Nahin Hai,

Dahej Asal Me Hinduon Ki Rasm Hai Jise Wah Daan Ka Naam Dete Hain Wah Dahej Isliye Dete Hain Ke Hindu Mazhab Me Ye Hai Ke Chaahe Koi Shakhs Maaldaar Ho Ya Ghareeb Uski Jaaydaad (Property) Thodi Ho Ya Caroron , Arabon, Me Jab Wo Mar Jaata Hai Toh Uski Jaaydaad Me Se Beti Ko Warsa (Hissa) Bilkul Nahin Milta , Isliye Jab Koi Hindu Apni Beti Ki Shadi Karta Hai  Toh Wah Apni Beti Ko Khaandaan Se Kaat Deta Haitoh Wah Apni Beti Ko Ghar Me Kaam Aane Waali Cheezein Deta Hai, Taaki Beti Ki Hausla’afzaayi Ho

Toh Sawaal Paida Hota Hai Ke Musalman Is Rasm Ko Kyon Akhtiyaar Karte Hain Jab Ke Unke Islaam Me Toh Aurat Ko Apne Baap Ya Bête Wagerah Ki Jaaydaad Se Warsa Milta Hai Balke Kabhi Kabhi Mard Se Zyada Aurat Ko Warsa Milta Hai Toh Fir Musalman Ko Kya Zaroorat Hai Ke Wah Hinduon Ka Tareeqa Akhtiyaar Kare ???

Asal Baat Ye Hai Ki Musalmano Me Bhi Hinduon Ki Tarah Riwaaj Hai Musalman Bhi Apni Betion Ko Jaydaad Se Mahroom Kar Dete Hain Agar Jaaydaad Me Hissa Dete Bhi Hain Toh Poora Nahin Dete,

Halaanke Allah Taala Ne Dahej Dene Ka Huqm Nahin Diya Balke Wiraasat Dene Ka Allah Ne Huqm Diya Hai Aur Jo Log Aulaad Ko Warsa Nahin Dete Unko Quraan Me Jahunnum Ki Saza Sunaayi Hai,

Kitne Afsos Ki Baat Hai Ke Dahej Ka Huqm Allah Ne Nahin Diya Wah Toh Badh Chadh Kar Diya Jaata Raha Hai Aur Warsa Dene Ka Huqm Diya Hai Toh Betion Ko Isse Mahroom Kiya Jaa Raha Hai, Dahej Ka Riwaaz Pahle Bahut Kam Tha Fir Dheere Dheere 2 Sadion Me Badh Gaya Aur Maujooda Daur Me Dahej Ek Rasm Ke Saath Sath Ek Bahtareen Karobaar Ban Chuka Hai….

 AGAR DAHEJ KI RASM CHALTI RAHI TOH ::

Jis Shakhs Ki Tamam Betiyan Hon Wah Toh Dahez Jama Karte Karte Tabaah Ho Jaaye Lekin Jiske Bête Hi Bête Hon Wah Baadshah Ban Jaayega , Islam Me Dahej Ka Koi Tasawwur Nahin Aur Naa Hi Nabi E Kareem Muhammad Sallalaho Alaihi Wasallam Ne Apni Betion Ko Dahej Diya Aur Naa Hi Nabi E Akreem Muhammad Sallalaho Alaihi Wasallam Ki Biwiyan Dahez Lekar Aayin Thin, Aur Na Kisi Sahabi Se Dahez Dena Saabit Hai

Agar Islam Me Dahej Hota Toh Zaroor Hadith Me Iska Tareeqa Aur Miqdaar Aur Dusre Ahkamaat Mazkoor Hote, Aur Aimma Kiraam Apni Kitaabon Me Dahez Ka Baab Baandhte Aur, Lekin In Baaton Me Se Kuch Bhi Nahin Hua Toh Malum Hua Ke Dahez Huqm E Ilaahi Nahin Balke Logon Ki Banaayi Hui Rasm Hai

To be continued..

#IslamicLeaks

#UmairSalafiAlHindi

DUA KE BAAD HAATHON KO CHEHRE PAR FERNA KAISA HAI ??

Bismillah Hirrahman Nirrahim



Dua Ke Baad Hatho Ko Chehre Par Ferna



Allah Pak Quran Me Farmate Hai

..Aur Hamne Yeh Kitab Nazil Farmaee Hai Jiss Mein Her Cheez Ka Saaf Biyan Hai Aur Hidayat Aur Rehmat Aur Khuskhabri Hai Musalmanon Kay Liye.

(Al Quran, Al Israa 17, Ayat 89)

Rasoollallah Sallallhu Alaihi Wasallam Ne Farmaya

” Sabse Behtareen Kalam Allah Ki Kitab Hai Aur Sabse Behtareen Tareeqa Muhammad Sallallahu Alaihi Wasallam Ke Tareeqa Hai …”

(Sahih Al Bukhari: Volume 9, Book 92, Hadith 382)


Ye Sabit Nahi Hai Ki Rasoolallah Dua Karne Ke Baad Apne Chehre Par Apna Hath Ferte The. Boht Si Ahadiths Hai Jo Kahti Hai Ki Rasool Allah ﷺ Ne Allah Ko Duao Me Pukara Lekin Koi Sabit Riwayat Nahi Hai Jo Kahti Hai Ki Rasoolallah Ne Duao Ke Baad Apne Chehre Par Apna Hath Fera. Jo Ye Kahte Hai Ki Duao Ke Baad Chehre Par Hath Ferne Chaiye Wo Kuch Hadiths Ko Bayan Karte Hai Lekin Tahkeek Karne Pe Ye Pata Chalta Hai Ki Wo Hadiths Saheeh Nahi Hai:

Pahli Riwayat:


Ye Riwayat Kiya Gaya Tha Ki Ibn Abbas R.A. Ne Kaha Ki Rasoolallah Ne Farmaya: “Jab Tum Allah Se Dua Mango, Sidhi Hatheli Se Mango Ulti Hatheli Se Mat Mango Aur Jab Duao Ko Khatm Karo To Apne Chere Par(Apne Hatho Ko) Ferlo. (Zaif)

(Sunan Ibn Majah 3866. Is Hadith Ko Imam Ibn Majah Ne Zaif Karar Diya Hai.)

Source Of Sunan Ibn Majah: Http://Sunnah.Com/Ibnmajah/34/40


Dusri Riwayat


Yazid Ibn Sa’id Al-Kindi R.A. Riwayat Karte Hai Jab Rasoolallah Duae Mangte The Wo Apne Hatho Ko Uthathe The Aur Apne Hath Apne Chehre Par Ferte The.(Zaif)


(Sunan Abi Dawud 1492. Is Hadith Ko Sheikh Albani Ne Zaif Karar Diya Hai.)


Source Of Sunan Abu Daud: Http://Sunnah.Com/Abudawud/8/77


Shaykh Al Islam Ibn Taymiyah Kahte Hai: Rasoolallah Ke Dua Me Hath Uthane Ke Hawale Se Ye Sabit Hai Kyuki Boht Si Sahih Hadiths Hai Lekin Dua Ke Baad Chehre Par Hath Ferne Ki Sirf Ek Ya Do Hadits Hai Jinhe Dalaail Ke Taur Par Nahi Liya Ja Sakta Hai(Kyuki Wo Hadiths Zaif Hai).

(Majmoo’ Al-Fataawa , 22/519 )


Al-‘Izz Ibn ‘Abd Al-Salaam Kahte Hai: Dua Karne Ke Baad Apne Hatho Ko Apne Chehre Par Siwae Jahil Ke Koi Nahi Ferta.

(Fataawa Al-‘Izz Ibn ‘Abd Al-Salaam , P. 47 )


Toh Shariat Me Is Amal Ki Ijazat Nahi Hai. Logo Ko Duao Ke Baad Apne Jism Par Bhi Hath Nahi Ferna Chaiye Na Hi Apne Ankho Ko Chumna Chaiye.

Ulemao Ne Ye Bayan Kiya Hai Ki Anguthe Ko Chum Kar Apne Aankho Par Rakhna Ek Biddat Hai Jo Ki Sufio Ke Tareeke Se Ijaad Hua Hai Aur Jo Iske Bareme Hadiths Hai Wo Rasoolallah Par Jhutha Mansub Kiya Gaya Hai.

Allah Hum Sabko Biddaton Se Mehfuz Rakhe , Quran Aur Sahih Hadees Per Amal Kerne Ki Neik Tawfeq De ,Hidayat E Ilm & Hidayat E Amal Ata Farmaye Aur Humari Ibadat Ko Qabul Farmaye .Aameen !

Allah Subhanahu Wa Ta'ala Hum Sabko Sahih Deen Seekhne Aur Samjhe ki Taufeeq De Aur Hume Quran Aur Sahih Hadees Ke Mutabik Amal Ki Taufeeq De Ameeen




Allah Se Du'a Hai Ke Hum Ko Ghar Walon Ko Aap Logon Ko Or Sare Musalmano Ko Quran O Sunnat Ko Sahaba Ke Manhaj Par Amal Karne Wala Fir Daw'at Dene Banaye Ameen Ya Rabbal Almenn


#IslamicLeaks
#UmairSalafiAlHindi