MAUT KA SAFAR...
"Maut Ka Safar Har Insan Ki Zindgi Ka Akhiri Safar Hai, Isi
Ko Hum "Safar-E-Akhirat" Bhi Kehte Hai. Zindgi Me Kuch Safar
Majbooran Ya Phir Ikhtiyari Taur Par Krne Padte Hain Lekin Akhiri Safar Ke Liye
Koi Ikhtiyar Nahi Diya Gaya. Hamesha Ke Liye Chale Jana Hai, Har Ek Ko Jana Hai
Aur Yahi Akhiri Thikana, Akhiri Manzil Aur Akhiri Gharana Hai. Sath Hi Jaza Aur
Saza Ka Muamla Bhi Hai.
Safar Ka Waqt Tai Shuda Hai Isme Koi Bhi Tabdeeli Nahi. Aur Sabse
Badi Bat Ki Achanak Kooch Krna Hai. Wapsi Mumkin Nahi, Khali Hath Jana Hai. Koi
Madadgar Sath Nahi Akele Jana Hai. Han Aamaal Ki Currency Sath Hogi Jo Qayamat
Ke Din Cash Hogi Wahi Kaam Aegi.
Har Musafir Ko Bas Apne Aamaal Hi Sath Le Kar Jane H,
Rabb-E-Kaynat Se Mulaqat Bhi Hogi Lekin Insaan Kitna Nidar Aur Kaisa Bekhauf
Bana Hua Hai, Halanki Uske Liye Kitni Nazuk Ghadi Aur Kaisi Kadi Azmaish Ane
Wali Hai. Maut Ka Safar Sabse Mukhtalif Safar Hai, Isliye Musafir Ko Ba Qaida
Tawajjoh Ki Zarurat H.
Yeh Duniya Na Humne Banai Hai Na Hum Iske Malik Hain, Is Duniya Ke
Malik Ki Marzi Ke Mutabiq Chalenge To Muamla Sahih Aur Safar Kamyab Hoga, Tab
Hi Mehfooz Manzil Tak Pahuchenge. Sochne Ki Bat Yeh Hai Kya Is Safar Ke Liye
Kuch Tayyari Ki Hai?
Kya Kya Karna Hai Jiska Allah
Tala Ne Hukm Diya Hai? Kya Kya Chhorna Hai Jisse Allah Tala Ne Mana Farmaya
Hai.?
Zindgi Kis Qadr Ba-Mayne Hai Lekin Iska Anjaam Ise Kitna Be-Mayne
Bana Deta Hai. Admi Bazahir Kitna Azad Hai Lekin Maut Ke Samne Woh Kitna Majbur
Nazar Ata Hai. Har Admi Apni Zindgi Ko Be-Inteha Tasawwur Kiye Hue Hai. Har
Admi Mojuda Duniya Me Apni "KAL" Ko Sawaarne Or Tameer Karne Ka
Mansooba Liye Hue Hai.
*Magar
Achanak Maut Akar Batati Hai Ki Tumhari "KAL" Is Duniya Me Nahi Balki
Agli Duniya Me Shuru Hone Wali Hai.* Jahan Duniya Ke Calender Lapet Kar Rakh
Diye Jate Hain. Woh Abdi (Kabhi Na Khatm Hone Wali) Duniya Hai. Insan Mansooba Bandi (Planing) Kar Sakta Hai Lekin Akhirat Ko Samne Rakh
Kar Kare To Uske Liye Behtar Hai. Admi "AAJ" Me Jita Hai Aur Apni
Asal "KAL" Ko Bhule Baitha Hai.
Hame Apne "AAJ" Se "KAL" Ki Khabar Malum Karni
Hai. "AAJ" Ke Amal Ka Natija "KAL" Bhugatna Hai. Log Maut
Ki Taraf Badh Rahe Hain Magar Khush Hain Ki Woh Zindagi Ka Safar Kaat Rahe
Hain. Zindagi Ek Dhoka Hai Jabki Maut Ek Yaqini Chiz Hai. Hum Zinda Sirf
Isiliye Hain Ki Abhi Hum Mare Nahi. Koi Shakhs Maut Se Nahi Jeet Sakta. Maut
Hame Amal Ke Mojuda Maidan Se Hata Kar Waha Daal Deti Hai Jahan Apne Aamaal Ka
Yaqini Anjaam Bhugatna Hai.
*Allah Hum Sabko "MAUT KE SAFAR" Ke Bare Me Sochne Or
Iski Tayari Karne Ki Taufiq Ata Farmaye. Ameen.*
