Al Tamur Traders

Saturday, February 4, 2012

HAZRAT ADAM(AS)

Bismillahirrahmanirraheem



HAZRAT ADAM(AS):



ADAM ibrani ka lafz hai, jiske maana hain " gehun ke rangwaala"


hz adam as, insaan jaat ke waalid (father) hain, jinko allah ne mitti(clay) se paida kiya aur unme rooh fooki,

farishton ko huqm diya ki adam ko sajda karen, sab ne sazda kiya, lekin shaitaano ke sardaar iblees ne sazda karne se inkaar kar diya

(surah al hijr ayat 28-31, surah saad 72-74)


jab allah ne wajah poochi to iblees ne kaha

" main isse bahtar hun, kyonki tune mujhe aag se paida kiya aur isko mitti se"

(surah aaraaf 12)


allah ko iblees ki yah gushtakhi pasand nahi aayi aur usko jannat se nikaal diya

jab allah duniya par aadam ko insaano ka khaleefa bana raha tha to farishton ko bada taajjub huwa ki ham to din raat teri ibaadat kar rahe hain, phir aadam ko paida karne ki kya zarurat hai,

allah ne kaha:

" jo main kar raha hun mujhe pata hai tumko iska ilm nahi hai"

(surah Baqarah 31)


" phir allah ne aadam ko cheezon ke naam sikha diye phir jab farishton se poocha to we jawab na de sake, aur aadam ne sab bata diye"

(surah baqarah ayat 31-33)


phir aadam hi se aapki biwi hawwa ko paida kiya


" aiy logon ! Apne rabb se daro jisne tumhe ek cheez se paida kiya aur usi se uska joda paida kiya aur un dono se bahut se mard aur aurton ko faila diya"

(surah nisa ayat 1)


" tauraat" me hai ki hawwa ko adam ke pahlu se paida kiya gaya


hawwa ko adam se paida karne me koi tajjub nahi hona chahiye, kyonki allah jab khud aadam ko mitti se paida kar sakta hai to hawwa ko adam se paida karne me kya tajjub hai ? Phir adam aur hawwa ko allah ne jannat me rakha aur unse kaha ki jo chaaho khaao piyo, lekin aazmaane ke liye kaha ki is ped(tree) ka fal(fruit) mat khaana, lekin shaitaan un dono ko bahkaa kar us ped ke paas le gaya aur qasmen khaakar unse kahne laga ki tumhare rab ne Iska fal khaane se isliye roka hai ki kahin tum farishta na ban jaao, ya hamesha ke liye jannat ke na ban jaao, bas un dono ne us ped ka fal kha liya,

tab unko allah ne huqm diya ki zameen(duniya) par utar jaao aur ek waqt tak tumhe wahin rahna padega,

jab adam ko ahsaas huwa ki we shaitaan ke bahkaawe me aa gaye hain, to unhone allah se tauba ki

(surah baqarah 35,36)

is tarah adam aur hawwa dono hi duniya par rahne lage, aur dono se unke do ladke paida hue, ek ka naam qaayin( qaabeel) aur dusre ka naam haabeel tha,

qaayin ka maana hota hai "lohaar" aur haabeel ha maana hota hai "beta",

adam as ek bete ka dusre bete ki judwa bahan se shaadi kar dete they, fir qaabeel ne apne bhai haabeel ko maar diya

quraan me aaya hai

" aiy nabi ! In logon ko adam ke do beton ke sacche haalaat padhkar sunaao ki jab dono ne (allah ke liye) qurbani kiya, phir unme se ek ki qubool hui aur dusre ki qubool nahi hui Toh kahne laga, "main zaroor tujhe maar dunga", dusre ne jawab diya " allah to sirf muttaqi logon ki hi qurbani qubool karta hai"

(al maida 27)


tauraat se pata chalta hai ki haabeel bhed-bakriya charaata tha isliye usne pahlothi ke bacchon ki qurbani di aur qaabeel ne fal(fruits) chadhaaya jisko allah ne qubool nahi kiya, jiske wajah se wah ghussa ho gaya usne apne bhaai ko maar diya

(utpatti 9/2:4),

qatl karne ke baat qaabeel ki samjh me nahi aa raha tha ki bhai ki laash ko kya kare ?

Quran me bataya gaya hai

" uske baad allah ne ek kawwa(crow) bheja, wa zameen ko kuredne laga taaki use dikhaaye ki wah apne bhaai ki laash ko kaise chhupaaye, wah kahne laga ! Haay kya main is kawwe ke baraabar bhi aqalmand nahi ki apne bhai ki laash ko chhipa leta, bas to wah pachtaane waalon me se ho gaya"

(surah maida 31)

is tarah insaan ne mari hui cheez ko zameen me dafan karna seekha

hz abdullah bin Masood ra bayaan karte hain ki nabi(sws) ne farmaya:-" jab bhi koi qatl hota hai to adam ke pahle bete ko us qatl ka kuch gunaah milta hai, kyonki yah pahla insaan hai jisne qatl karne ka riwaaj diya"

(sahih bukhari, kitabul ambiya 33-35)


haabeel ke qatl ke baad aadam aur hawwa se "sheet" paida huwa jiska maana hai "badal", yani sheet haabeel ka badal tha, jisko uske bhai qaabeel ne qatl kar diya tha aur phir in dono, yani " qaabeel" aur "sheet" se insaano ki aulaaden bani

(utpatti 4/25,4/3)


muhammad bin ishaq ne likha hai ki adam ke qul 20 bete aur 20 betiyan paida hui,

kuch kahte hai 60 bete,60 betiyan, phir inse aulaaden bani,

tauraat me hai ki sheet ke paidaish ke baad adam 800 saal tak zinda rahe, jab sheet paida huwa us waqt adam ki umar 130 saal thi, phir unse bete aur betiyan paida hui, aur adam ki umar wafaat ke waqt 930 saal thi

(utpatti 5/1-5)

kuch aalimon ka kahna hai ki adam ko Hindustan me utaara gaya aur kuch ka kahna hai makka me, magar inme se kisi baat ke liye hamare paas koi saboot nahi hai, isi tarah iski qabr jo hindustan me paayi jaati hai koyi saboot nahi !!!