Bismillahirrahmanirraheem
FALSAFA-E-HAJJ
hajj
islam ka 5wi ruqn hai,
irshad
rabbani hai,
"
aur logon me hajj ka elaan kar do, log tumhare paas paidal bhi aayenge aur
dubli oontniyon par bhi door daraaz raaston se pahunchi hongi "
(surah
hajj 27)
hajj apne
saare arkaan wa aamaal aur manasik wa ibaadat ke saath itaa'at mahaz, be'chun
chana huqm baja laane aur har mutaalbah ke aage sar jhukaane ka naam hai,
haji
kabhi makkah me nazar aata hai, kabhi mina me, kabhi arafat me, kabhi muzdalifa
me, kabhi thaharta hai, kabhi safar karta hai, kabhi gaadhta hai, kabhi
ukhaadta hai,
wah huqm
ka paband aur chasm wa aabru ka paband hai, uska khud na koi iraada hota hai, na
faisla, na intekhab ki aazadi,
wah mina
me saans bhi nahi lene paata ke usko araafaa jaane ka huqm milta hai, lekin
muzdalifa me rukne ki ijaarat nahi hoti,
arafaat
pahunch kar wah din bhar dua wa ibadat me mashgool rahta hai, ghuroob e Aaftab ke baad usko taqaaza hota hai ke zara susta le aur raat ko yahin rah jaaye,
lekin uske bajaaye usko muzdalifah jaane ka huqm milta hai, wah zindagi bhar
namaz ka paband raha tha, lekin arfah me usko huqm hota hai ke maghrib ki namaz
tark kar de, isliye ke wah allah ka bandah hai, namaz ya apni aadat ka paband
nahi,
wah ye
namaz muzdalfah pahunchne ke baad isha ke saath milaakar padhta hai, muzdalfa
me uska khoob ji lagta hai, aur sochta hai ke yahan jee bhar kar thahre, magar
is baat ki ijaazat bhi usko nahi milti aur usko mina ki taraf rukh karne ka
huqm hota hai,
HAJJ KA
MAQSAD:
Hajj ke
maqsad kya hain ??
Iske
mutaalik hakeem ul ummat hz shah wali ullah dehlawi (rh) likhte hain ke
"
hajj ki haqeeqat ye hai ke saaliheen ki ek badi jamaat ek khaas zamaana me jama
ho aur unlogon ka haal yaad kare ,jinpar allah taala ka inaam huwa, maslan
ambiya, sadiqeen, shohada, saaliheen aur us jagah Jama hon, jahan allah taala
ki nishaaniyan maujood hain aur jahan aimma e deen aur saaliheen ,ummat allah
ki taazeem me gidgidaate hue, rote hue, khair wa bakhsish ke taalib aur kaffara
ke ummeedwaar ban kar aate hain, isliye ke jab ummatein is kaifiyat ke saath
jama hoti hain toh rahmat wa maghfirat ke nazool me takhalluf nahi hota, nabi e
akram sallalaho alaihi wasallam (pbuh) ka irshad hai ke:- shaitaan is qadr
ranjeeda, zaleel wa khwaar aur ghussa se jala hua kisi din nahin hota jitna
arfa ke din "
(hujjatul
baligha jild 1 page 59)
hajj ka
ek bada buniyadi maqsad ye hai ke hz ibraheem (as) se tajdeed mu'allaq kiya
jaaye, unki meeraas ki hifazat ki jaaye, unki zindagi apne saamne rakhkar apni
zindagi ka mu'aina kiya jaaye, musalmano ki haalat ka jayeza liya jaaye, aur
unki zindagi me jo ghaltiyan fasaad aur tahreef nazar aaye us ko door kiya
jaaye, aur uske asal shar'chasma ki taraf ruju kiya jaaye,,
isliye ke
hajj ek qism ka saalaana ijtema hai, jiske zariye musalman apne aamal aur apni
zindagi ka hisaab wa tajurbah kar sakte hain, aur un qaumo aur societies ke
asraat se chhutkaara pa sakte hain jinke beech me wah rahte hain,
hakeem ul
ummat shah waliullah dehlawi likhte hain ke:-" hajj ke maqasid me us
meeraas ki hifazat bhi hai jo sayyedena hz ibraheem (as) aur hz ismael (as) ne
hamare liye chhodi hai, isliye ke ye dono millat e haneefi ke imam aur arab me
uske hamnawa aur baani kahe ja sakte hain, nabi e akram sallalaho alaihi
wasallam (pbuh) ki baisat bhi isliye hui thi ke millat e haneefi aap ke zariye
duniya me ghaalib aaye aur uska parcham buland ho "
allah
taala ka irshad hai
"
millat hai tumhare baap ibraaheem ki "
(surah
hajj 78)
isliye ye
zaruri hai ke is millat ke imam se jo cheezein hamko darpe me mili hain,
maslan khasail fitrat aur manasik uski
ham hifazat karen, aur
nabi e
akram sallalaho alaihi wasallam (pbuh) ka irshaad hai:-" apne masha'er (
maqamat e hajj) par thahro, isliye ke tum apne baap ki ek aur waraasat ke
waaris ho "
hajj
millat ka ek saalana ijtema ya dusre alfaz me
period hai, jiska millat e islami ki sachhai wa pakizgi aur uski asli
aur haqeeqi buniyadon ki hifaazat me bada aham hissa hai
is par
shah wali ullah farmate hai ke
" (
hajj ke ) maqasid me wah baat bhi hai jiske liye hukumatein numaish ya sarkari
jashn kiya karti hain, jisko dekhne ke liye qareeb wa door har jagah ke aadmi
jama hote hain, ek dusre se milte hain, apni hukumat aur apni millat ki taalimaat
se aashna hote hain, aur uski muqaddas maqaamaat ki taazeem baja laate hain,
isi tarah hajj musalmano ki numaish ya sarkaari
jashn hai jinme unki shauqat zaahir hoti hai, unki qaumein jama hoti
hai, unki millat ka naam roshan hota hai "
Allah taala
ka irshad hai
"(yaad
karo) jab Hamne khaana kaaba ko logon ke liyn ek maqam e ruju aur maqaam e aman
muqarrar kiya "
(surah
baqarah 125)
HAJJ
ISLAMI QAUMIYAT KA MUZAHERA HAI:
hajj, un
watni, nasli, insaani, aur ilaaqaai qaumiyaton ke khilaf islami qaumiyat ki
jeet hai, jinke bahut se islami mumalik mukhtalif awaamil aur dabaao ke
maat'hat shikaar hain, wah islami qaumiyat ka muzahera aur elaan hai,
yahan
pahunch kar tamam islami qaumein apne qaumi wa mulki libaason se aazaad hokar
jo unki pahchaan ban gaye they, aur jinse bahut si qaumein taassub ki hadd tak
wa'basta hain,
islam ka
ek qaumi libas akhtiyaar kar leti hain, jinko deen wa fiqah aur hajj wa umrah
ki istalaah me AHRAAM kaha jaata hai,
sab
aajizi, wa ahtiyaazi wa lachaari ke saath ek zabaan me ek taraana aur ek hi
naara lagaate hain
"
labbaik allahumma labbaik, la shareeka laka labbaik, innal hamida wan niyamata
wala mulk la shareeka laka "
trans:
aiy mere allah Main haazir hon, tera koi
shareek nahi, main haazir hoon, saari taareefein aur nematein tere hi liye zeba
hain aur hukumat wa imaarat me bhi, tera koi shareek nahin "
unme
hakim wa muhkam, aaqa wa naukar, ameer wa faqeer, chhote bade ki koi taareef
nahin hoti,
unke
libaas aur sada donon me islami qaumiyat jalwa'ghar nazar aati hai, yahi haal
hajj ke dusre aamaal, ibadaat, manasik,
aur maqamaat ka hai, jahan har qaum wa mulk ke log dosh ba'dosh nazar
aate hain , aur arab wa azam ke saare farq mit jaate hain,
HAJJ KI
HIKMATEIN:
Hajj un
logon par farz kiya gaya hai jo wahan pahunchne ki iste'taat rakhta ho aur hajj
ke baare me allah taala ka irshad hai,
"
hajj ke chand mutayyin maheene hain, jo shakhs un muqarrar mahino me hajj ki
niyat kare use khabar daar rahna chahiye ke hajj ke dauraan unse koh shahwaani
fael, koi bad'amli, koi ladaayi jhagde ki baat sar'zad na ho "
(surah
baqarah 197)
Hajj ek
bain al islami conference hai jisme musalman ek dusre se muta'aarif hote hain,
aur ek dusre ke dukh dard se waaqif hote hain, aur " kul momin akhwah
" ka sahih namuna pesh karte hain, aur sabse badh kar hajj islami ittehaad
ka mazhar hai, aur aalim e islam ke liye mujtahida program ki tashkeel ka
bahtareen mauqa hai,
ARKAAN E
ARBA KA KHULAASA:
Islam ke
arkaan arba yani namaz, zakaat, roza aur hajj ka mushtarka maqsad ye hai ke
hamaqe akhlaaq durust hon nasoos pak wa saaf hon, aur ek aisa sahih mua'shera
wajood me aaye jisme har taraf bhalaai hi bhalaai ho, buraai bilkul na ho,
aapsi
muhabbat, akhwat, hamdardi, bahami ta'aawun, aur adab wa ehteraam ki fiza qayem
ho, agar ye ibaadatein hamare andar ye akhlaaq aur khoobiyan na paida kar saken
toh phir samjh lijiye ke usme khaami hai, aur qayamat ke din ye sab ibaadatein
hamare kaam na aayengi, aur hamare liye wabaal e jaan saabit hongi
Jaisa ke
nabi e akram sallalaho alaihi wasallam (pbuh) ka irshad hai ki nabi e akram
sallalaho alaihi wasallam (pbuh) ne farmaya:-" tum log jaante ho ke muflis
kaun hai ?, aapke sahaba ne jawab diya ke ham mese muflis wah shakhs hai jiske
maal aur mata'a na ho,
nabi e
akram sallalaho alaihi wasallam (pbuh) ne farmaya:-" meri ummat me muflis
wah shakhs hai jo qayamat ke din, namaz, roza, aur zakaat lekar aayega, lekin
uski haalat ye hogi ke usne duniya me kisi ko gaali di hogi, kisi par tohmat
lagaayi hogi, kisi ka maal hadap kiya hoga, kisi ka khoon kiya hoga, ya kisi ko
maara peeta hoga, toh kisi ko uski kuch neki di jaayegi, agar us par waajib
haqooq ki adayegi se pahle uski nekiyan khatm ho gayin toh un logon ke gunaah
us shakhs par daal diye jaayenge , phir use jahannum me phenk diya jaayega
"
(muslim
jild 3 pg 220)
is hadith
se islami ibaadaat ki hiqmat aur falsafa saamne aa gaya hai, aur isHadith e
mubarak ko madde'nazar rakhte hue, har insaan ye dekh sakta hai ke ,
kiya
hamen in ibaadaton se faayede haasil ho rahd hain ??
Allah
taala ham sabko haq baat kahne aur sunne ki taufeeq de....... Ameen
(maulana
obaidurrasheed iraaqi shaheed- pakistan )