Al Tamur Traders

Wednesday, January 8, 2014

MAULANA ABUL KALAM AZAAD (RH) KA 1942 ME MUSALMANO SE KHITAAB:






.Bismillahirrahmanirraheem

MAULANA ABUL KALAM AZAAD (RH) KA 1942 ME MUSALMANO SE KHITAAB:


23 March 1942 Ko, Baagh Beroon Delhi Darwaaza Lahore Me Laakhon Musalmano Ke Ek Azeem Ijtema Se JisKa Ehtemam Jamiat E Ulema Aur Majlis E Ahrar Ne Kiya Tha,

Maulana Azaad Ne Darj Zel Kalimaat Irshad Farmaaye They...

Main Kal Lahore Aaya Toh Mujhe 1921 CE Ka Zamana Yaad Aa Gaya, Jabke Maine Jamiat E Ulema Ke Jalse Ki Sadaarat Ki Thi,

Main Aapko Bataana Chaahta Hoon Ke Is Waqt Mere Azam Wa Imaan Ki Jo Soorat Thi, Is Me Ab Tak Zarra Bhar Tabdeeli Nahin Hui Hai,

waqt Ke Taqaazon Se Baaa Baaton Me Tabdeeli ho Sakti Hai, Lekin Jin Cheezon Ki Bunyaad Hi Ek Thos Aqeede Aur Haqeeqat Par Hon Wah Nahin Badalte,

Maine 18 Saal Ki Umar Me Soch Samjhkar Ek Faisla Kiya Tha, Chunanche Ab Tak Is Par Qayem Hoon

Main Aankhon Se Dekh Raha Hoon Ke Mere Saamne Ek Chiraagh Jal Raha Hai,

Agar 20 Lakh Insaan Bhi Mujhe Yaqeen Dilaana Chaahen Ke Chiraagh Nahin Jal Raha Hai Toh Main Ek Mustaqbal Haqeeqat Se Aankhon Ko Band Karne Ke Liye Taiyyar Nahin Hoon,

Hindustan Ghair Mulki Iqtedaar Ke Panje Me Jakda Hua Hai, Lekin Ab Ye Panja Tootne Wala Hai,

Mistee Churchill Ghaflat Ke Daayere Me Mahsoor Hain,

Kaash Ye Shakhs Britain Ka Wazeer E Aazam Hone Ke Bajaaye Cambridge University Ka Professor Hota Toh Ghujashta Taareekh Ko Pesh E Nazar Rakh Kar, Zamaana Haal ke Mutaallik Apni Raaye Qayem Karta

Ab Duniya Ki Qaumon Ko Ghulaam Banakar Nahin Rakha Ja Sakta

Ye Khatarnaak Jung Jab Bhi Khatam Hogi "Great Britain" "Great" Nahin Rahe Ga,

Hindustan Bhi Azaad Hoga, Aur Asia Wa Africa ke Dusre Mulkon Ko Bhi Azaad Karna Hoga,

Aaj Ka China Badal Chuka Hoga, Aur Aaj Ka Russia Duniya Ki Bahut Badi Taaqat Ban Jaayega,

Britain Mahaz Englishtan Tak Mahdood Rah Jaayega,

Isliye Wazeer E Azaam Wiston Churchill Ke Tamam Daawe Khokhle Hain !!

Musalmano Ko Is Fareb me Nahin Aa Jaana Chahiye,

Angrez Bahadur Nahin Bach Sakta, Aur Na Hamen Bacha Sakta Hai, Use Boriya Bistar Baandh Kar Yahan Se Jaana Hoga,

Sawaal Ye Hai Ke Ba'haisiyat Ek Hindustani Musalman Ke Hamaen Mustaqbil Ke Mutaalliq Kya Faisla Karna Chahiye ???

Main Aane Waale Zamaane Ko Kamzori Aur Tazabzub Se Nahin Dekhta Balke Azam Himmat Aur Hausla Se Dekh Raha Hoon...

Jo Qaum Apne Aapko Bachaane Par Qaadir Na Hon, Usko Tahaffuzaat Nahin Bacha Sakte...

Kaaghaz Ke Purjon Par Likhe Hue Qanoon Mahfooz Nahin Kar Sakte,

Musalmano Ki Tadad 10 Caror Hai, Agar 10 Crore Ki Bajaaye Musalman 10 Lakh Bhi Hote....

Aur Unke Dil Me Ye Khyaal Hota Ke Wah Marne Ke Liye Nahin, Zinda Rahne Ke Liye Hain, Toh Koi Qaum Unko Nahin Mita Sakti,

Hindustan Me Aabad Itni Badi Musalman Tadad Ko Akliyat (Minority) Qaraar Dena, Aur Unke Liye Akliyati Huqooq Aur Akliyati Alhedaiygi Ka Mutaalba Karna, Na Sirf Buzdili Hai, Balke Unke Shaandaar Mustaqbil (Future) Ke Liye Tabaah Kun Hai,

Mere Nazdeek Hindustan Me Musalmano Ki Haisiyat Akliyat Ki Nahin Balke Dusri Badi Aksariyat Ki Hai,

Aur Ye Aksariyat Hindustan Ki Qismat Ke Tamam Siyaasi Wa Iqtesaadi Wa Tamadduni Faislon Me Barabar Ki Haqdaar Aur Hissedaar Hai,

Pas Meri Jagah, Kamzori Aur Tazabzub Ki Nahin, Balke Yaqeen Aur Imaan Ki Hai, Lekin Agar Itni Badi Tadad Yani 10 Crore Ke Hote Hue Bhi Tum Ye Khyaal Karte Ho Ke , Fana Ho Jaoge, Mit Jaoge,

Toh Iska Kya Ilaaj Ke 10 crore Laashon Ko Koi Tahaffuz (Security) Aur Koi Dastoor Nahin Bacha Sakta,

Mere Seene Me Ek Angeethi Dahek Rahi Hai, Main Wahi Haraarat Aapke Andar Paida Karna Chaahta Hoon,

Mera Imaan Aur Mera Islam Mujhe Pukaar Pukaar Kar Kah Raha Hai Ke,

In Halaat Me Mere Liye Sirf Ek Farz Rah Gaya Hai,

Aur Wah Ye Hai Ke Angrezon Ki Hukumat Ke Khilaaf Jo Chulha Dahek Raha Hai, Usme Lakdiyan Daalta Rahun,

Main Koi Aisa Sawaal Uthaana Nahin Chaahta Jisse Teesri Taaqat (Angrez) Ke Haath Mazboot Hon,

Duniya Me Wahi Bachta Hai Jiski Paaon Ki Nas Mazboot Hon,

Main Aapko Aaindah Naqoosh Ke Bharne Se Nahin Rokta,

All India Congress Ki Sadaarat Ke 2 Baras Me Maine Jo Koshishen Ki, Aur Musalman Leadaron Ne Jis Tarah Unhe Thukraaya , Unke Bayaan Karne Ka Ye Mauqa Nahin,

Lekin Jadh Ki Cheez ye Naksha Nahin, Darakht Ko Jadh Ki Jadh Ki Zaroorat Hai,

Aap Is Ibtedaai Mqaddama Aur Usool Ko Samjh Len Toh Sainkdon Sawaalaat Hal Ho Jaayenge.....

(Maulana Abul Kalam Azaad)

" 10 Crore Ki Aabaadi (Musalmano) Ko Akliyat Qaraar Dena Buniyaadi Taur Par Ek Ghalat Nazariya Hai, Jiske Tahat Musalmano Ke Dilon Me Ehsaas E Kamtari Paida Kiya Ja Raha Hai"

(Raam Garh Me, Congress Ke Session 1940 Me Khitaab)